ഉംറയിലും ഹജ്ജിലും ഔപചാരികമായി പ്രവേശിക്കുന്നതിന് നിശ്ചയിക്കപ്പെട്ട സ്ഥലത്തിന് സ്ഥലപരമായ മീഖാത്ത് (മീഖാത്ത് മകാനി) എന്നു പറയുന്നു. അത് രണ്ടിലും പ്രവേശിക്കുന്ന സമയത്തിന് സമയപരമായ മീഖാത്ത് (മീഖാത്ത് സമാനി) എന്നും പറയുന്നു. മീഖാത്തിന്റെ നാമവൈശിഷ്ട്യം നേരത്തെ സൂചിപ്പിച്ചിട്ടുണ്ടല്ലോ. ലോകമുസ്ലിംകൾക്കാകമാനമായി 5 മീഖാത്തുകളാണ് നബി(സ) നിശ്ചയിച്ചുതന്നിട്ടുള്ളത്. അവിടത്തുകാർക്കും ആ ദിശയിലൂടെ കടന്നുവരുന്നവർക്കുമുള്ള മീഖാത്തുകളാണവ. മീഖാത്തിനും മക്കക്കുമിടയിലുള്ളവർക്ക് (ഉദാഹരണമായി ജിദ്ദ, മസ്തൂറ, ബദ്ർ, ബഹ്റ, ഉമ്മുസ്സലാം, ശറാഇഅ്) അവരുടെ വാസസ്ഥലങ്ങൾ തന്നെയാണ് മീഖാത്ത്. മക്കക്കാർ ഹജ്ജിന് അവിടെവെച്ചും ഉംറക്ക് ഹറമിനുവെളിയിൽ തൻഈം പോലുള്ള സ്ഥലങ്ങളിൽ വെച്ചുമാണ് ഇഹ്റാം ചെയ്യേണ്ടത്. താഴെ പറയുന്നവയാണ് പ്രസ്തുത 5 മീഖാ ത്തുകൾ:

1. ദുൽ ഹുലൈഫ: മദീനയിൽനിന്നും മദീന വഴിക്കും വരു ന്നവരുടേത്. “അബ് യാർ അലി’ എന്നാണ് ഇപ്പോഴത്തെ പേര്. അവിടെനിന്ന് മക്കയിലേക്കുള്ള ദൂരം 450 കി.മീ.

2. അൽജുഹ്ഫ: സിറിയ, ഈജിപ്ത്, മൊറോക്കോ എന്നിവിടങ്ങളിൽനിന്നും ആ വഴിക്കും വരുന്നവരുടേത്. റാബഗിനടുത്താണിത്. റാബഗ് നഗരത്തിൽനിന്നാണ് ആളുകളിപ്പോൾ ഇഹ്റാം ചെയ്യാറ്. അവിടെനിന്ന് മക്കയിലേക്കുള്ള ദൂരം 183 കി.മീ.

3. ഖർനുൽ മനാസിൽ: നജ്ദ് മേഖലയിൽനിന്നും ആ വഴിക്കും (ഉദാഹരണമായി ദമ്മാം, രിയാദ്) വരുന്നവരുടേത്. “അസ്സൈലുൽ കബീർ’ എന്നാണിപ്പോഴത്തെ പേര്. അവിടെനിന്ന് മക്കയിലേക്കുള്ള ദൂരം 75 കി.മീ.

4. യലംലം: യമനിൽ നിന്നും ആ വഴിക്കും വരുന്നവരുടേത്. ‘അസ്സദിയ’ എന്നാണിപ്പോഴത്തെ പേര്. അവിടെനിന്ന് മക്കയിലേക്കുള്ള ദൂരം 92 കി.മീ.

5. ദാതുൽ ഇർഖ്: ഇറാഖിൽനിന്നും ആ വഴിക്കും വരുന്നവരുടേത്. അവിടെനിന്ന് മക്കയിലേക്കുള്ള ദൂരം 92 കി.മീ.